افضل كوميديا فى رمضان من سنين
مسلسل رمضان 2020 من بطولة " نيلى كريم" اللى بتقوم بدور "سكر" و " اسر ياسين" اللى بيقوم بدور "عمر" ومجموعه من الممثلين اللى مش مشهورين ابرزهم وافضلهم واللى كانوا يعتبروا مفاجأه "شريف دسوقى" اللى قام بدور سباعى او سبعبع وكمان "محمد عبدالعظيم" اللى قام بدور عم سامح او الضلالى والاكثر كأبه فى العالم "دنيا ماهر" اللى قامت بدور نجلاء ..
البوستر الرسمى للمسلسل
شريف دسوقى "سبعبع".
محمد عبدالعظيم "سامح الضلالى".
دنيا ماهر "نجلاء".
المسلسل يصنف كوميدى درامى ، من انتاج "العدل جروب" واخراج "كامله ابو ذكرى" وتأليف "احمد وائل" و "عمروالدالى" ، بتبدأ احداث المسلسل اللى بتعرفك على "سكر" النصابه المحترفه اللى بتنصب على محلات المجوهرات وبيعاونها صاحبها اللى متربى معاها من وهما صغيرين "حماده" اللى بيقوم بدوره "اسلام ابراهيم" وكمان بيعاونها على كده صاحبتها "رضوى" وهى "زينب غريب" بيكتشفهم "عمر" اللى هو برده نصاب محترف " وبيسرق من "سكر" المجوهرات اللى هى لسه سارقاها !!
بعد كده بيدخلوا فى صراع لغايه لما يتفقوا انهم يشتغلوا مع بعض وبالصدفه البحته بتتكون العصابه الكبيره اللى بتتكون من 10 افراد وبيبدأوا رحلتهم فى النصب من خلال خطط ذكيه ومحكمه ..
لكن بعيدا عن الكوميديا فالمسلسل لو بدون شويه الافيهات فهى قصه مظلمه جدا وان احنا اتعاطفنا وحبينا الاشرار النصابين مش الناس المنصوب عليهم ، النقد الوحيد اللى نقدرناخده على المسلسل هو تصويره للجريمه فى اطاركوميدى وجعلك انك تحب المجرمين ..
لكن كأداء تمثيلى وكتابه واخراج هو كويس جدا جدا ويعتبر افضل كوميدا اتقدمت رمضان ده ..
واللى خلى المسلسل ياخد شهره عاليه ان "نيلى كريم" تعبتنا من الغم والكأبه بصراحه وبقالها رمضانات كثير مبتقدمش الا دراما سوده كون انها تغير من نفسها رمضان ده كان شئ صعب ، الجدير بالذكر ان المسلسل واخد تقييم عالى على موقع "IMDb" طبعا لان المسلسل محلى فقط فالتقيممات قليله لكن كلها ايجابيه وتقييمه 8.2 .
المسلسل اتحدد له بعد رمضان على طول او فى اواخر رمضان كمان ان هيبقى ليه جزء تانى فى رمضان 2021 بسبب النجاح الكبير اللى حققه ، لكن المسلسل خرج من حسابات رمضان لان "كامله ابو ذكرى" قالت انها مش هتقدم حاجه رمضان اللى جاى وكمان لان بطلة المسلسل "نيلى كريم" اتفقت على تقديم مسلسل جديد مع المخرج "ماندو العدل" رمضان اللى جاى .
من الحاجات اللى لازم تتذكر واحنا بنتكلم عن المسلسل ده ان فى صاحب مكتبه فىمدينه طنطا اعلن انه هيعمل ابحاث لطلاب الجامعات قصاد مقابل مادى وخد منهم الفلوس وفى يوم التسليم قفل المكتبه وهرب بالفلوس ، والطلاب راحت علشان الاستلام كذا مره لكن كانوا بيلاقوا ان المكتبه مقفوله لغايه لما كسروا باب المكتبه ودخلوا لقوا ورقه مكتوب عليها "مليونير .. مليونير".
رد "اسر ياسين" لما عرف بـ "عمليه النصب".
من الجمل اللى اشتهر بيهم المسلسل ..
انا يا ابنى ؟ شكرا على ثقتك الغاليه 😍
كده برضه يا نجوميه ؟! 😐
متقلقوش .. ان شاء الله فوق العظمه 😃
ده انا فتحى بتاع زمان .. شبح العالم 😏
هو انا علشان ولا ليا قريب ولا حبيب ولا غريب ؟! 😭
You play with the Joker .. You fall for ever ! 😉
من الحاجات اللذيذه برده اللى تبين مدى تأثر الجمهور بالمسلسل هو تشبيههم المسلسل بالمسلسل الاسبانى "La casa de papel"...
"la casa de papel" تشبيه "100 وش" بالمسلسل الاسبانى
تشبيه "عمر" بـ"البروفيسور"
انتظرونا فى الحاجات اللى جايه ونتمنى يكون عجبكم ❤
ليست هناك تعليقات:
إرسال تعليق