محمود عبدالعزيز وواحد من أفضل اعماله
مسلسل "جبل الحلال" او "ابو هيبه فى جبل الحلال" او الاسم المتدارج بين الناس "ابو هيبه" ، مسلسل من بطولة العملاق "محمود عبدالعزيز" و"طارق لطفى" وبيشارك ابناء الفنان "محمود عبدالعزيز" الاثنين معاه فى المسلسل "كريم" و"محمد" اما البطوله النسائيه فكانت لـ "وفاء عامر" و"سلوى خطاب".
المسلسل انتاج سنه 2014 من اخراج "عادل اديب" و"تامر حمزه" وتأليف "ناصر عبدالرحمن" ، والشركه المنتجه هى "مجموعه فنون مصر" اللى بيشارك فيها "محمود عبدالعزيز" مع "ريمون مقار".
بيقوم "محمود عبدالعزيز" بدور "ابو هيبه" واحد من اكبر تجار السلاح الاثار فى مصر لكن اللى بيميزه عن غيره انه خالق لنفسه ولتجارته قوانين يمشى عليها وكذلك اللى شغالين تحته لازم يمشوا عليها وكمان معتز بعيتله وعزوته وبيتفاخر بأصله دائما لكن "ابو هيبه" كان له عدو وهو "كين" اللى بيقوم بدوره "طارق لطفى" ، "كين" غجرى طرده جد "ابو هيبه" من قريه "الكوامل" فى محافظه "سوهاج" من زمان ، وده سبب كره "كين" لـ"ابو هيبه" ودائما عاوز يوصل ان هو احسن منه من غير اصول وعيله .
"ابو هيبه" متزوج من "غنيمه" اللى بتقوم بدورها "وفاء عامر" وعنده 3 بنات بيقوم بأدوارهم "ياسمين صبرى" و"هبه مجدى" و"مى سليم" ، له اخ اسمه "حكم" بيقوم بدوره "اشرف عبدالغفور" اللى متزوج من "زكيه" اللى بتقزم بدورها "سلوى خطاب" ، بيبدأ المسلسل بتعرض "ابو هيبه" لعمليه اغتيال ، فبيمسك "حكم" اخوه مكانه بسبب طمعه فيه وظنه انه مات ، لحكم 3 اولاد منهم "ماهر" اللى بيقوم بدوره "كريم محمود عبدالعزيز" وهو مختلف تماما عن اخواته وعن ابوه والذراع اليمين لعمه ، اما بالنسبه لـ "محمد محمود عبدالعزيز" فبيقوم بدور "فارس" ابن "كين".
كان من المفروض ان هيبقى فى جزء ثانى من المسلسل واتكتب فى اخر حلقه لكن متيسرش انه يتعمل قبل وفاة الفنان "محمود عبدالعزيز" ، اتمنى ان ولاده يعملوا جزء جديد ويحاولوا يطلعوه فى احسن صوره تكريما ليه ..
لقطة النهايه من المسلسل
المسلسل ككل جميل جدا فى الكتابه والاخراج ، اما بالنسبه للاداء التمثيلى فكان "محمود عبدالعزيز" و"طارق لطفى" الافضل ، لكن اداء الثلاثى بنات "ابو هيبه" مكنش فى مستوى المسلسل وكان ممكن يبقى افضل .
الجدير بالذكر ان الفنان "محمود عبدالعزيز" توفى فى سنه 2016 وكان المسلسل ده يعتبر من اواخر اعماله ، فى اخر سنوات عمره قدم ثلاث مسلسلات من ضمنهم المسلسل ده وكمان "باب الخلق" فى 2012 و رأس الغول فى 2016 .
اتمنى منكم انكوا تدعوله بالرحمه والمغفره ❤
من افضل مشاهد المسلسل ..
أبو هيبه قام على حيله .. مفيش مخلوق هيستجرى يفتح عينه تانى !
اللى ملهوش خير فى امه مفيهوش خير ❤
رغم ان "ابو هيبه" تاجر سلاح لكن منقدرش نتغاضى عن علاقته العظيمه بأمه وكذلك اخواته ، والفرق اللى فى المعامله اللى عاملها "حكم" لامه واللى عاملها "ابو هيبه" لامه ، "ابو هيبه" مطردش "حكم" لما خانه ، لكنه طرده لما ساء معامله امه.
جبت الذهب ده كله .. والفلوس دى كلها منين يا حكم ؟
طلق يا واد البت لاطلقك من الدنيا !
بعض اقوال "ابو هيبه" ..
1) اللى ميخفش من ربنا .. خاف منيه !
2) تاجر سلاح خايف من رصاصه !
3) حاسس ان القانون اللى عملته لنفسى .. نسيته !
4) اللى شاف الموت ميخافش منه .. اصلى شفته وعرفته !
5) السلاح منتج زى اى منتج لكنى ببيعه للى يستحقه .. وعملت للشمال قانون احارب بيه اللى يعصى اوامرى !
6) سلاح ايه ؟ مفيش سلاح .. الواد عندكم لو عاوزين تقتلوه اقتلوه !
متحف اثار ملك لـ "ابو هيبه" فى منزله
اتمنى ان المقال يكون نال اعجابكم ❤
ليست هناك تعليقات:
إرسال تعليق