الرحلات تنتهى بلقاء الاحبه 💔
مسلسل امريكى من انتاج نتفليكس ، انتج سنة 2018 ، المسلسل مصنف "رعب" و "دراما" ، من موسم واحد قابل للتجديد لاكثر من موسم ، عدد حلقاته 10 حلقات ومدة كل حلقه حوالى 50 دقيقه ، المسلسل من بطولة "Michiel Huisman" المشهور بدوره فى مسلسل "صراع العروش" وكمان "Carla Gugino" اللى ظهرت فى "سوبرمان" الاخير "Man of Steel" ، المسلسل من اخراج "Mike Flanagan" اللى معروف بلقب "مخرج الرعب" المسلسل مأخوذ من رواية لـ"Shirley Jackson" اللى صدرت فى سنة 1959 ، وتحمل نفس الاسم.
المسلسل بيحكى عن منزل "ال هيل" المسكون ، بين الماضى والحاضر ، العائلة مكونه من 7 افراد ، اب وام و5 اولاد ، الاب شغال فى اعادة ترميم البيوت ، بيشترى البيت بغرض تجديده ومن بعد كده يبيعه ، لكن بعد شرائهم للبيت وانتقالهم فيه بيتعرضوا لمشاكل من اشباح اشباح المنزل ، المخرج فى جو من الرعب والتوتر بينقلك ما بين الماضى والحاضر ، الاولاد وهما صغيرين وبعد ما كبروا علشان يوضحلك اللى حصل زمان واللى ترتب عليه دلوقتى ، وبيبين وجهة نظر الابطال فنفس الوقت وبيرافق الابطال اشباح المنزل فى صورة شياطين بيواجهوها فى خيالهم من وهما صغيرين زى "الادمان" و"الخيانه".
البوستر الرسمى للمسلسل
موضوع معقد على طول القصه يتعلق بتورط المنزل بكل اخفاق للاولاد ، مثال شخصيه "لوك" اللى بيقوم بيها "Oliver Jackson Cohen" ، حيث ان "لوك" يظهر انه مدمن مخدرات كشخص بالغ والذى يصارع للتخلص من الادمان وعندما نبدأ بمعرفة المزيد حول مرحلة طفولته نرى انه كان يتعرض للاهمال ولم يثق والداه يوما بكوابيسه التى كان يراها ، من السهل دائما فى قصص الرعب القاء اللوم على اصوات الاشباح المرعبة ولكن عندما يكون المذنبين هم والداك فيصبح الامر اكثر ترويعا !
اكثر ما يميز المسلسل هو الاخراج ، كادرات تحفه بمعنى الكلمه والانتقال بين الماضى والحاضر كان عظيم ويخليك عايز تكمل علشان توصل انه يرجع للماضى تانى او انه يوريك الحاضر واختيار كاست التمثيل كان موفق جدا والتشابه بين الممثلين الكبار والصغار كان واضح.
يذكر ان الروايه الاصليه مأخوذه من قصه حقيقيه ، حيث قالت الكاتبه انها استمدت الالهام من بعض الباحثين فى علم النفس اللى كتبوا عن قوى خارقه فى منزل قاموا بتفتيشه فى القرن الـ19.
الرعب اللى فى المسلسل رعب مختلف عن باقى المسلسلات او الافلام ، الرعب فى المسلسل ده رعب نفسى بحت مش من نوعيه الرعب اللى تظهر قدامك صورة وحش مخيف او صوت شبح مرعب ، لكن هو بيلعب على وتيره مختلفه ، انصح بمشاهدة المسلسل بشدة.
بعض من الكادرات العظيمة اللى فى المسلسل ❤
اتمنى ان المقال يكون عجبكم ❤
حلوه جدا تسلم الايادى بجد فهمت المسلسل لانه معقد شويه لما شوفته
ردحذفحلوه جدا ربنايحفظك ويحميك شرح مفصل
ردحذف